İstanbul Böyükşəhər Bələdiyyəsinin sədri Əkrəm İmamoğlunun saxlanılması və baş verən son hadisələr fonunda əksər şərhçilər tarixin təkrarlandığını deyir. Belə ki, Türkiyə Prezidenti Rəcəb Tayyib Ərdoğan da İstanbul Böyükşəhər Bələdiyyəsinin sədri olub və bir müddət həbs həyatı yaşayıb. Bu həbs onun siyasi karyerasında təkan olub.
Əksər şərhçilər məhz buna görə iddia edir ki, bu həbs Əkrəm İmamoğlunun karyerasına müsbət təsir edəcək.
Tarix təkrarlana bilərmi? İmamoğlunun həbsi onun siyasi karyerasına necə təsir edəcək?
Politoloq Murad Sadəddinov deyib ki, tarix həm təkrarlanır, bəzən isə yeniliklər ilə yadda qalır:
“Əkrəm İmamoğlunun saxlanılması və baş verən son hadisələr həqiqətən də cənab Rəcəb Tayyib Ərdoğanın vaxtilə üzləşdiyi olaylara bənzəyir. Lakin Əkrəm İmamoğlunun Ərdoğan kimi olub-olmayacağını indidən demək çox çətindir.
Bugünkü reallıqlara əsaslansaq demək olar ki, İmamoğlunun tərəfdarlarının sayının artması onun şəxsi nüfuzu ya da xarizması ilə əlaqəli deyil. Hazırkı kütlə sırf onun həbsinə etiraz edir. Bu fakt Türkiyə seçiciləri üçün vacib amildir.
Təəssüf ki, baş verən olaylara yanaşmada tələsirik. Ümumiyyətlə, Türkiyədə seçkilər sabah, ya da bir həftə sonra keçirilməyəcək. Erkən seçkilər haqda da nə isə deyilmir. Qarşıda üç il var və bu vaxt ərzində çox şey baş verə, vəziyyət əsaslı surətdə dəyişə bilər. Özü də nəzərə alaq ki, bəhs etdiyimiz ölkə Türkiyədir.
Türkiyə daxili siyasətində seçkilərə təsir edəcək hadisələr tez-tez baş verir. Bu bəzən müxalifətin maraqlarına, bəzən isə iqtidarın maraqlarına uyğun olur. Ona görə də gözləmək lazımdır. Bəlkə də 1 ay sonra bütün bu hadisələr unudulacaq və biz tamamilə yeni hadisələri müzakirə edəcəyik”.
Globalinfo.az
