Qeyri-neft gəlirlərlə sosial xərcləri tam ödəmək mümkündür-Deputatdan açıqlama

“Dövlət büdcəsində nəzərdə tutulan sosial xərclərin gələn il proqnozlaşdırılan ÜDM-də payı 14.0 faiz olacaq. Bu isə hətta bir sıra İqtisadi Əməkdaşlıq və İnkişaf Təşkilatı (OECD) ölkələri ilə müqayisədə daha yüksək göstəricidir.

 Məsələn, sosial xərclərin ÜDM-də payı, İrlandiyada 13.4, Koreyada 12.6, Çilidə 12.2, Türkiyədə 12.0, Meksikada 7.5 fazidir. OECD ölkələri üçün orta göstərici 20 faizdir”.

Bu barədə Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov Milli Məclisin plenar iclasında Azərbaycanın əsas sosial göstəricilərdə guya region ölkələrindən geri qaldığını qərəzli şəkildə iddia edən marjinal siyasi qruplara cavabında bildirib.

İqtisadçı millət vəkili qeyd edib ki, icmal büdcə üzrə sosial xərclərin məbləği də nəzərə alınsa, Azərbaycan bu göstərici üzrə OECD ortalamasına yaxınlaşmaqdadır.

Onun sözlərinə görə, adambaşına düşən büdcə xərci gələn il cari məzənnə ilə 2420 dollar olacaq: “Bu göstəriciyə görə Azərbaycan əksər region ölkələrini geridə qoyacaq. Azərbaycanda sosial təminat sistemi daha dayanqıqlıdır. Çünki bu xərclər bəzi ölkələrdə olduğu kimi xarici borclanma deyil, daxili mənbələr hesabına ödənilir. Xarici borcun ÜDM-də payına görə, Azərbaycan MDB-də ən yaxşı göstəriciyə malikdir. Digər tərəfdən, dövlət büdcəsinin qeyri-resurs gəlirləri sosial xərcləri 25.0 faiz üstəliyir. Hətta qeyri-neft gəlirlər ilə sosial xərcləri tam ödəmək mümkündür”.