Müasir dünya reallıqları göstərir ki, hər bir ölkə üçün ilkin amil təhlükəsizliyin təmin olunmasıdır. Çünki çağırışların kəskinləşdiyinin, reallıqların isə daha təhlükəli hal aldığının şahidi oluruq. Təhlükəsizlik dediyimiz zaman isə artıq klassik mənada anladığımız məfhumların sərhədlərindən kənara çıxmağa çoxdan məcbur olmuşuq. Təhlükəsizliyin enerji, iqlim, ərzaq kimi elementləri ilə yanaşı, yeni bir istiqaməti də formalaşır ki, o da lider amilidir. Bunu formalaşdıran amilin özü də mövcud reallıqlardır. Nəticə etibarilə dünya siyasətinin ən əziyyət çəkdiyi məsələ lider qıtlığında gizlənir.
Bu sözləri 1xeber.media-a açıqlamasında siyasi elmlər üzrə fəlsəfə doktoru, politoloq Şəbnəm Həsənova deyib. O qeyd edib ki, Ukrayna münaqişəsi kimi mürəkkəb kombinasiya məhz lider amilinin zəifliyi nəticəsində daha da çıxılmaz vəziyyətə gəlib. “Bu amilin fonunda bir daha Azərbaycan Prezidenti İlham Əliyevin mürəkkəb kombinasiyaların öhdəsindən gəlmək bacarığının şahidi oluruq. Belə ki, biz Azərbaycan torpaqlarının 30 illik işğal dövründə ədalətsiz mövqe ilə yanaşı, tətbiq edilən, ardı-arası kəsilməyən ikili standartlardan son dərəcə əziyyət çəkdik. Özlərini demokratik dəyərlərin carçısı, insan haqlarının qoruyucusu hesab edən, beynəlxalq təhlükəsizlik sisteminin qrantı görən qüvvələr sanki qulaqlarını və gözlərini yumub Azərbaycanı nə görmək, nə də eşitmək istəyirdilər. Azərbaycan Lideri isə məhz bu çətin reallıqlar qaranlığında məqsədyönlü, qətiyyətli və sistemli işi ilə dünyada Azərbaycan reallığı formalaşdırmağı, onu aydınlığa çıxarmağı bacarıb. Sanki dünyaya işıq bəxş edib ki, beynəlxalq hüququn norma və prinsipləri görülsün. Bu fikirlər tamamilə günümüzün reallıqlarına əsaslanır. Çünki hazırda dünya siyəsətində Azərbaycan reallığı, diplomatiya masasında isə Prezident İlham Əliyev obrazı, portreti mövcuddur. Azərbaycan işğala, separatizmə son qoyaraq ərazi bütövlüyü və suverenliyini bərpa etməklə kifayətlənməyib, hətta əldə etdiyi Zəfərlə barışmaq istəməyən qüvvələrə bu reallıqları həzm etdirib. Nəticədə Azərbaycan yalnız regional siyasətdə fəal aktora çevirməyib, həm də ölkənin gücünü real faktora, milli maraqlarını prinsipial mövqeyə əsaslandırıb. Dövlətimizin başçısı sadəcə Ermənistanın deyil, ona havadarlıq edən qüvvələrin həmin dövrün status-kvonunu rəsmiləşdirmək imkanlarını əllərindən alıb, bütün neqativ cəhdləri elə yuvasındaca boğub”, - deyə politoloq əlavə edib.
Ş.Həsənova bu gün Azərbaycanın heç kimdən yardım almadan, mədət ummadan öz torpaqlarını yenidən qurub-yaratdığına diqqət çəkib: “Dövlət başçımız məhz öz gücünə, xalqının dəstəyinə inanır. Məhz bu qətiyyətli addımların nəticəsidir ki, Zəfərimiz dünya birliyi tərəfindən qəbul olunub. Güclü, xarizmatik, dərin siyasi erudisiyaya, aydın vizyona sahib olan Liderimiz xalqımızın milli maraqlarını reallaşdırmağı həyat məqsədinə çevirib. Bu siyasət Vətənə, torpağa, yurda bağlılıqdan irəli gəlir. Ukrayna dramının kökündə duran əsas faktor da bu cür lider qıtlığından çəkilən əziyyətdir”.
